ដោយ៖ គង់ហេង
កំពង់ចាម៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានថ្លែងកោតសរសើរថា អង្គភាពច្រកចេញចូលតែមួយ ខេត្តកំពង់ចាម ពោលគឺរដ្ឋបាលខេត្តនេះដែលដឹកនាំដោយឯកឧត្តម អ៊ុន ចាន់ដា ជាអភិបាលខេត្តបានក្លាយជាអង្គភាពគំរូទូទាំងប្រទេសដែលទទួលបានជ័យលាភីជាបន្តបន្ទាប់។
ឯកឧត្តមអភិសន្តិបណ្ឌិត ជាឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានថ្លែងកោតសរសើរបែបនេះ ក្នុងដំណើរអញ្ជើញចូលជួបសំណេះសំណាលសួរសុខទុក្ខ និងពិនិត្យអំពីវឌ្ឍនភាព នៃការបំពេញការងាររបស់មន្ត្រីនៅអង្គភាពច្រកចេញចូលតែមួយ របស់រដ្ឋបាលខេត្តកំពង់ចាម មុននឹងចូលរួមពិធីសម្ពោធអគារ សមិទ្ធផលនានា និងពិធីសំណេះសំណាលជាមួយកងកម្លាំងនគរបាលជាតិ នៃស្នងការដ្ឋាននគរបាលខេត្តកំពង់ចាម។
ឯកឧត្តមបាន បានថ្លែងថា៖ អង្គភាពច្រកចេញតែមួយខេត្តកំពង់ចាម ជាពិសេសរដ្ឋបាលខេត្តកំពង់ចាម ដែលដឹកនាំដោយឯកឧត្តម អ៊ុន ចាន់ដា ជាអភិបាលខេត្ត ដែលបានរៀបចំនិងបណ្តុះបណ្តាលក្រុមការងារស្នូល ឲ្យក្លាយជាមន្ត្រីមានសម្ថភាពខ្ពស់ រហូតដឹកនាំអង្គភាពមួយនេះ ក្លាយជាអង្គភាពគំរូទូទាំងប្រទេស រហូតទទួលបានជ័យលាភីជាបន្តបន្ទាប់។
គួរបញ្ជាក់ថា អង្គភាពច្រកចេញចូលតែមួយខេត្ត គឺជាអង្គភាពរដ្ឋបាលមួយ ដែលមានគោលបំណងផ្តល់សេវាសាធារណៈផ្សេងៗដល់ប្រជាពលរដ្ឋក្នុងខេត្ត។ តាមរយៈការផ្តល់សេវានេះ អង្គភាពនេះមានគោលដៅសម្រួល និងបង្កើនប្រសិទ្ធភាពក្នុងការផ្តល់សេវាសាធារណៈដល់ប្រជាពលរដ្ឋ។ នេះគឺជាចំណុចសំខាន់ៗមួយចំនួនទាក់ទងនឹងអង្គភាពច្រកចេញចូលតែមួយខេត្តមាន៖ ផ្តល់ភាពងាយស្រួលដល់ប្រជាពលរដ្ឋក្នុងការទទួលបានសេវាសាធារណៈ,បង្កើនប្រសិទ្ធភាព និងតម្លាភាពក្នុងការផ្តល់សេវា,កាត់បន្ថយការិយាធិបតេយ្យ និងភាពស្មុគស្មាញក្នុងការផ្តល់សេវា, អង្គភាពនេះផ្តល់សេវាសាធារណៈជាច្រើនប្រភេទ ដូចជាសេវាទាក់ទងនឹងអត្តសញ្ញាណប័ណ្ណ សេវាចុះបញ្ជីដីធ្លី សេវាអាជីវកម្ម និងសេវាផ្សេងៗទៀត,ការផ្តល់សេវាកម្ម:អង្គភាពនេះត្រូវបានបង្កើតឡើង ដើម្បីបម្រើសេវាសាធារណៈជូនដល់ប្រជាពលរដ្ឋឱ្យមានគ្រប់ ក្រុង ស្រុកទាំងអស់របស់ខេត្ត ងាយស្រួលដល់ប្រជាពលរដ្ឋក្នុងការផ្តល់ និងការទទួលសេវាសាធារណៈរបស់ប្រជាពលរដ្ឋ៕
